كل سنة وانتم طيبين الشتا وصل…
هو صحيح لحد دلوقتى لسة الشتا الجامد مبدأش (او على الأقل هنا فى الاردن) لكن عموما احنا فى الشتا خلاص….
وبالتالى قلت المرة دي اكلمكم عن شوية منتجات قلت ممكن تعجبكم و تفيدكم فى الشتا
اول منتج حتكلم عنه هو فرشة الجسم من The Body Shop
انا ادمنتها الحقيقة لأنها بتعمل سكراب ناعم للبشرة وكمان بتشد الجلد بشكل ملحوظ من اول مرة
ممكن كمان لو حبين بديل فيه فرش مشابهة عند العطارين وفيه كمان جوانتي اسمه الجوانتي المغربي بيعمل نفس الشىء بس بيستخدم على البشرة وهي مبلولة مش وهى ناشفة زي الفرشاة وده بيتباع فى الصيدليات ومحلات العطارة ومش غالي على فكرة
بعد كدة وانا لسة تحت الدش آخر خطوة بعملها قبل ما اطلع هى انى بدهن جسمي بلوشن نيفيا للحمام ….انا معنديش فكرة اذا فيه شركة تانية عاملة نفس الفكرة وهى لوشن يتدهن والواحد لسة فى الحمام …الحلو فى اللوشن ده انه مش محتاج وقت بمجرد ما تدهنيه اشطفيه بس تأثيره فعلا بيستمر وبيفرق جامد
المنتج اللى بعد كدة برضه من The Body Shop هو محلي المفضل لأن منتجاته خالية من الزيوت المعدنية اللى بتكون موجودة فى الكريمات العادية وبالتالي مش بينشف بشرتي جامد ( مشكلة عنيفة كل شتا و جربت كل اللوشنز و الكريمات اللى فى الدنيا والله) فى الأخر لاقيت انه اكتر حاجة بتناسبني هى زبدة الجسم اللى عنده اي حد راح بودى شوب قبل كدة عارف انهم بيعملوا كذا عطر و بيعملوا من العطر ده كل حاجة لوشن و كريم و برفان و كله انا المفضل عندي هو جوز الهند والشيا بحسهم مرطبين و بحب ريحتهم لأنها مش نفاذة وناعمة قوي
بعد كدة الزيت المعجزة زيت الأرجن….تقريبا كل الناس بتتكلم عنه لأنه زيت بتاع كله شعر و بشرة ووجه وايدين و كله انا قلت اجربه والحقيقة عرفت ليه كل الناس بتتكلم عنه كدة لأنه فعلا رائع والحلو انه ريحته حلوة قوي فعلا ودى احلى حاجة فى الموضوع
نسيب البشرة ونتجه الى الدفا من قريب جبت “بطانية” الحقيقة هو شال بس فعلا احساس البطانية فعلا و اللى حبيته انه قماشه مش سميك وبالتالى مش بيتخن اللى هى اكتر حاجة بتدايقنى فى هدوم الشتا يا نتدفا و بنان اتخن يا نبرد فكدة حليت المشكلة تماما الحمد لله
المنتج اللى بعد كدة هو شمعة معطرة….انا بحب الشموع المعطرة جدا لأن بحس ريحيتها ناعمة وخصوصا فى الشتا و البرد بحب الشموع المعطرة اكتر لأن ريحيتها ناعمة ومش بتحتاج نفتح كل الشبابيك عشان نشغلها…
فى الشتا بحب الشموع اللى ريحيتها فانيليا او كستر او قرفة وفيه شموع بتكون بكذا بهار مع بعض زي السنيمون رول او الpumpkin انا بجيب الشموع دي من السوبر ماركت فمفيش ماركة معينة بفضلها اللى بيهمني الريحة
آخر حاجة معايا انهاردة هى ابلكشن نزلته ببلاش يساعدنى على حساب دورات النوم وبالتالي يساعدنى على تحديد امتى انام عشان اقوم فايقة ….انا ربطه بالشتا لأن الواحد فى الشتا بيبقة صعب عليه قوي الصحيان بدري وفعلا فرق معايا كتير الأبليكشن اللى نزلته انا من الwindows store اسمه sleepy time بس اكيد فيه حاجات سبهه على ال apple او الأندرويد
للمزيد من التفاصيل اتفرجي على الفيديو ده 🙂 وكل شتا وانتم دفاينين
امومتي 