ازيكم يا ماميهاتي الحبيبات
مع السنة الجديدة بقترح عليكي تدخلي الرياضة ( لو مش مدخلها بالفعل) فى يومك لفوايدها المتعددة…. ان شاء نتكلم عن الموضوع ده بالتفصيل بعدين
المهم دلوقتى لانى عارفة قد ايه انت مشغولة فبقدملك تمرين واحد فقط تقدري تحافظي عليه و هو البلانك
كل المطلوب له انت و ستوب واتش و اي موبايل دلوقتي ببيبقى عليه ستوب وتش, حتحطى الموبايل قدامك على الارض و تاخدي الوضع اللى شايفاه فى الصورة وتحاولي تحافظي على الوضعيه دي اطول مدة ممكنة
وعشان متتخضيش لو دي اول مرة بتعمليه او اول مرة تعمليه من زمان فعلى الارجح انك حتكملي نص دقيقة بالعافية قوي -الموضوع مش سهل- لكن فعال جدا
البلانك هو تمرين لعضلات كتير جدا فى الجسم والاهم انه التمرين الوحيد اللى بيوصل لعضلات البطن العميقة, مفيش تمرين تاني بيقدر يوصلها زيه
فيه اكتر من وضعية للبلانك زي ما شايفين فى الصورة ممكن تختاري اي واحدة عجباكي او تغيري بينهم وتحاولي تقفلي دقيقة يا بطلة
ولانه مش محتاج اكتر من دقيقتين زي ما قلنا فسهل انك تعمليه فى اى وقت و فى اى مكان
🙂 جربي و حابة اسمع تجربتك على اى وسيلة من وسايل التواصل بينا
امومتي 