زي ما انتم عارفين انا بحب اجمع قصص الامهات اللى تميزوا فى حلول بتواجهنا كأمهات…
قصة انهاردة عن بنوتة كتكوتة و امها اللى مذاكرة شخصية بنتها و ازاي اقنعت بنتها بلبس الحجاب لما وصلت للسن المطلوب
القصة بدأت من سنة تقريبا….بنتي اللى فى سنة تالتة اعدادي شافت صحباتها فيه منهم لبسوا الحجاب…
فجاتلي و قالتلي انها بتفكر تلبسه…
لأن عارفة شخصية بنتي كويس…كنت متأكدة ان ده قرار لحظي مش مدروس قوي وعلى الارجح هترجع فى كلامها بعد كام يوم…
قلتلها لأ…. رد غريب صح؟ لسة… لسة
اعترضت طبعا و اصرت…
فأصريت انا كمان…
فضلت افتح الموضوع معها كتير و استعمل معاها علم النفس العكسي…
اعدد ادامها المزايا والاغراءات بس ارفض
فكرانى لو اتحجبتي هاجبلك هدوم جديدة؟ لا طبعا لو عملتي ايه هرفض..
كبر الموضوع فى دماغها و فضلت تلح باصرار و انا ارفض باصرار برضه
لمدة قرب السنة تقريبا….فترة طويلة انا عارفة…
لكن اللى كنت عاوزاه حصل الموضوع اتحول لفكرة بنتي بالكامل مش انا خالص و بقة حلمها اللى بتدافع عنه و بتقاتل عشان يتحقق ومش واخده بالها خالص من الافكار اللى عمالة ازرعها فى دماغها بقالي سنة وبالتالي لو حد من القرايب او المعارف… و انتم عارفين بقة وخصوصا ان البنت من وجهة نظر المجتمع تعتبر صغيرة… قالي ليه حجبتيها…بدري… برد بثقة مش انا على فكرة و هى طبعا بتؤيد بثقة و قوة…
ربما تبان الفكرة غريبة و ممكن يكون الاسلوب ده مش مناسب لكل البنات… بس انا طول عمر بنتي بركز معاها فى احتياجاتها النفسية و بحاول افهم دماغها و ازاي اقنعها بدل من الجبر اللى يخليها تقلعه او متجليها فرصة زي ما بيحصل مع بنات كتير اليومين فدخلتها من مدخل وان كان غريب بس مناسب لها…
دي قصة انهاردة بس انا حابة اسمع قصصكم انتم ياتري اقنعتوا بناتكم بالحجاب ازاى؟ ولا موقفكم ايه من الموضوع ده؟
لو عندكم قصص مميزة تخصكم او تخص امهات تعرفوهم ابعتهملي على
omomaty.reem@gmail.com
او صفحتي على الفايس بوك
facebook/omomaty
امومتي 