انا دايما بحب ادور على وصفات تكون مناسبة للرجيم و مبنية على الأكل النباتى…بس المشكلة بتكون ازاى تبقى الحاجة لذيذة من غير دهون و كريمة و الجو ده؟

عشان كدة بحب الشوربة دى لأنها حققتلى كل اللى بدور عليه ده طعم فعلا لذيذ  من غير الاعتماد على الزبدة و الكريمة والكلام ده

المقادير ( 4 اشخاص):

1 فلفل حلو ( احمر للون او اى لون مش مشكلة)

3-4 طماطم

1 بصلة متوسطة الحجم

4 فصوص ثوم

ملعقة كبير زيت زيتون او زيت نباتى

زعتر و ريحان اخضر

بهارات بيتزا او بهارات ايطالية ( او اى بهارات تفضيليها)

رشة ملح و فلفل خفيفة

الطريقة:

1. نبدأ بترتيب الخضروات (الفلفل و الطماطم والبصل والثوم) فى صينية فرن أنا بفضل انى اقطعهم الى اربع عشان الشوا يوصل لكل الخضار مش الجزء الخارجى بس لو كانت مش مقطعة.

2.بنضيف الزيت و الزعتروالريحان و البهارات

3. بنشغلى الشواية فقط فى الفرن لو للفرن شواية لو مفيش ممكن نشغل النار من فوق فقط لو فيه الامكانية دى او ممكن كمان نشوي الخضار على شوايا او قلاية حديد على البوتاجاز وبسيبها 5 دقايق او لحد منلاقى الخضار اتشوية شوية و اطرافه اغمقت بس من غير ما يتحرق طبعا

4. بنسخن ا لتر ( اربع اكواب) من مرقة الخضار على النار و بنضيف ليها الخضار المشوى و اهم حاجة نضيف العصارة اللى حتنزل من الخضار فى الصينية لأن هى اللى فيها كل الفايدة و الطعم و بنسيبها على النار لحد اما الشوربة تغلي

5. نضرب كل ده فى الخلاط او بالخلاط اليديوى و ممكن نزود هنا بهارات كمان لو حاسين انها لسة محتاجة

ملحوظة: ممكن نضيف قطع دجاج و مع خبز التوم ممكن تكون وجبة كاملة

لخبز التوم

1. نرش 1/2 ملعقة زيت زيتون على راس توم مقطوع طرفها عشان يتشرب الثوم بالزيت فى الفرن و ندخله تحت الشواية زى الخضار

2.بنقطع خبز كايزر او ممكن نستخدم توست (بفضل التوست الكامل عشان الفايدة و الطعم)

3.ندهن التوم المشوى مع زيته على الخبز

4.نضيف بهارات ايطالية و رشة ملح وفلفل خفيفة (وممكن نحط اى بهارات بنحبها )

5.ممكن نضيف الجبنة اللى بنحبها ايا كان نوعها (متزريلا او شيدر او بارميزان او جبنة رومي)  وندخلها الفرن لحد ما تسيح الجبنة بس و تتحمر اطراف الخبز

                                                  وبألف هنا و شفا