ازيكم يا ماميهاتى الحبيبات

ياريت تدخلوا برجيلكم اليمين ….ومعلش ارجو ريحة البويا ما تضايقكمش…موقع جديد و كدة زي ما انتم عارفين…

اكيد اغلبكم جيتوا هنا من الفايس بوك….ويمكن بعضكم من الشقة القديمة…قصدى الموقع القديم…ويمكن شوية حبايبى كدة من اليوتيوب ( الواحد حاسس نفسه منتشر قوى بالشكل ده)…

لكن ايا كان المكان الىّ وصلكم هنا ( و اللى أحب انكم تكتبولي فى الكومنتس جيتوا منين بالظبط) فاهلا وسهلا بيكم…نورتم…اتفضلوا help your self  المطبخ مش بعيد….اوكى كفاية استظراف و ندخل فى الجد…

انا مين و بأى حق عاملة موقع و قناة على اليوتيوب وبتاع…وليه تسمعوا كلامى اساسا…

هأقولكم….بصراحة و من اللآخر انا مش اخصائية اجتماعية ولا دكتورة ولا اخصائية تغذية ولا عندى اي مبرر محترف انكم تسمعوا لأى حاجة بقولها…

انا دراستى اساسا تدريس….انا خريجة تربية نوعية….يعنى فن ممزوج بعلم النفس التربوى….بس غير كدة انا فيا طبع طول عمرى…اى حاجة تهمنى اوى ( مهما كانت هايفة) احب اذاكر كل حاجة عنها….انا واحدة مضيعة كل وقت فراغها فى القراية و البحث ( حاجة يمكن تعتبروها مملة يمكن بس بالنسبالى لأ)… فالبطبع اما بقيت ام العادة دى انتقلت لأهم حاجة فى حياتى اللى هى ولادى….

لما كان عمر ابنى 8 شهور تقريبا ( من حوالى اربع سنيندلوقتى) اتغيرت حياتنا كأسرة لما بدأت اطبق عادة البحث و المذاكرة على الأمومة …وبدأ امهات حواليا يلاحظم الموضوع ده و بالتحديد ام من معارفى كانت حامل ايامها قالت انها تحب تتعلم ازاى تعمل كدة…من هنا بدأت افكر ان اللى اتعلمته انشره للناس…عملت جروب صغير على الفايس بوك…حاطيت فيه صحابى و شيرت معاهم اى مقالة عجبتنى و طبقتها…هنا واحدة صاحبتى لفتت انتباهى ان الكلام اللى بشيره كويس بس مش كل الناس بتفهم انجليزى كويس وانى اقدر اترجم الكلام ده…ومين يعرف يمكن الموضوع يكبر عن دائرة صحابى…مكنتش فكرت فى حاجة زى كدة قبل كدة…بس قلت نجرب و ماله…ولأن الفايس بوك ايامها كان مجرد صورة و كومنت او نوت مفيش فرصة لاختيار فونت حلو او صور او فواصل….بدل ما اترجم المقالات على شكل بوستات على الفايس بوك ( مع انها دلوقتى موضة) فكرت اعمل بلوج…بعد فترة اقترحت عليا واحدة صاحبتى انى ما اكتفيش بالترجمة بس الأهم من وجهة نظرها التجربة…حابة اعرف تجربك الشخصية اكتر من المعلومة النظرية…من هنا اتولد موقع السابق

ولمدة تلات سنين تقريبا….من وقت ما كنت حامل فى بنتى….كنت بكتب مقالات عن كل الموضوعات اللى بتهمنى….سواءا تريبة او ديكور او رجيم او طرق لتسلية الولاد…وحاجات تانية كتير….وفى تلات سنين اتعدى زوار البولج ال19 الف تقريبا

من سنة تقريبا جاتى رسالة من شاب…مالوش علاقة بالأمومة…بس قالى انه عجبه اسلوبى و شايف انى مفروض اعمل الكلام ده فى فيديوهات…

مكنتش فكرت خاااااالص قبل كدة فى الموضوع ده! انا مش مذيعة وماليش علاقة بالفيديوهات الا تخاطيف كدة…يعنى اظبط فيديو رحلة ولا مشورع ايام شغلى كمدرسة…مش حاجة بروفيشونال يعنى…

بس…قلت اسأل الناس رأيهم ايه…لاقيت حماس من كلاللى سمع بالفكرة فقلت اجرب….

انا معرفش الموضوع ده هيوصل لفين…معرفش كتير يوتيوبرز عرب او مصريين…زى برضه ما معرفش بلوجرز مصريين او عرب كتير…بس طبعا فيه و كتير اكيد…

هى مغامرة…قفزة الايمان زى ما بيسموها…نط و انت مغمض…

لو مطلعتش بأى حاجة من الموضوع ده…يكفينى انى بعد ما وصلت لنص التلاتينات و بعد قعاد فى البيت خمس سنين…لسة بجرب حاجات جديدة…وبتعلم…و اتمنى يتعلم منها ولادى…او على الأقل يتعلموا…انهم ما يبطلوش يجربوا حاجات جديدة…

وآخيرا انا ام مصرية زوجى اردنى ومقيمة فى الاردن,,,ولادى احمد و اندلس…4  و 3 سنين…متزوجة من خمس سنين ( يعنى من قبل الثورة و الهجرة بالكوم والافلام دى)….اتعرفت على جوزى ازاى؟ لا دى بقة تانية خالص