ازيكم يا ماميهاتي الحبيبات انهارد جايبالكم وصفة تجهزوها فى الاجازة و ممكن تحطوها فى الفريزر و تسحبوا منها لمدة تنفع فطار للولاد او ياخدوها المدرسة و تنفعك انت كمان لو بتشتغلي كوجبة جاهزة. الحلو فى الوصفة دى ان القرع العسلي من الخضار الغني بالبيتاكاروتين اللى بيمتص احسن بعد طبخه يعني قيمته الغذائية بتعلى بالطبخ مش بتقل ووجوده فى المافنز هنا مع الزبادي بيعلي من كمية البروتين و الفايبر فيها و بيخلينا نستخدم دهن أقل و سكر ااقل كمان لان القرع بيحليها.
المقادير:( تصنع من 18-24 قطعة)
4 بيضات
2 كوب سكر
2.5 كوب قرع مهروس ( بشوي القرع فى الفرن بعدين بهرسه و بحتفظ به فى الفريزر)
نصف كوب زيت نباتي
نصف كوب لبن زبادي
3 كوب دقيق (1.5 دقيق اسمر و 1.5 دقيق ابيض) بستعمل نوعين لان الدقيق الاسمر لوحده مش بيخلي الكيك منفوخ واسفنجي بس لو معندكوش مانع تطلع مكتومة حبة استعموا دقيق اسمر بس افيد او دقيق ابيض و شوفان مطحون ممكن برضه
1 ملعقة صغيرة بايكنج صودا
2 ملعقة صغيرة بيكنج بودر
1 ملعقة صغيرة قرفة ( انا بستعمل ضعف الكمية لاننا فى بيتنا بنحب القرفة قوي و ممكن تستعملوا بهارات القرع : قرفة , جنزبيل,قرنفل,جوزة الطيب,البهارات السبعة)
1 ملعقة صغيرة ملح
2 كوب شكولت تسبس او شكولاتة مقطعة لقطع صغيرة
الطريقة:
– نسخن الفرن على درجة حرارة متوسطة ( 180). ونجهز صواني المافنز اما بدهنها او بوضع ورق مافنز او قوالب سلكون مدهونة)
- نضرب المكونات السائلة سوا , البيض , السكر, القرع , الزيت و الزبادي.
- فى وعاء منفصل بنضيف المكونات الجافة سوا ونخلطهم
- نضيف خليط الدقيق بالتدريج و نستمر فى الخفق
- نوقف الخلاط او العجانة ونضيف الشكولتة و نقلبها قليلا
- نضيف العجين فى قوالب المافن و نملا القوالب لمسافة التلتين فقط
- تخبز لمدة 15-20 دقيقة او حتى يتحمر الوجه قليلا
- نتركها لتبرد قبل التقديم او التبريد
ملحوظة:
للتبريد يمكن وضع المافنز فى كيس فريزر محكم و يمكن تبريدها لمدة تصل ستة اشهر
بالهنا والشفا للمزيد من التفاصيل شاهدي هذا الفيديو
امومتي 