عارفة ان الاسم غريب والحقيقة حاولت افكرله فى ترجمة حرفية معرفتش…. التشاودر هو عبارة عن شوربة سميكة و كريمي بقطع من الخضار و اللحمة او السمك و الدجاج ان وجد صحيحة….فهو حاجة مابين الشوربة واليخنة مع بعض…

تشاودر الذرة اكلة نباتية تماما ( vegan ) وممكن تضيفوا عليها اي حاجة بتحبوها براحتكم

المقادير:

كوبين ذرة

بصلة متوسطة

عودين كرفس

فصين توم

3 جزرات متوسطة او جزرتين كبار

فلفل اخضر حلو ( ثمرة واحدة وممكن للحفاظ على اللون نستخدم فلفل احمر او اصفر)

حبة بطاطس واحدة

عبوة حليب جوز هند قليل الدسم ( وممكن تستخدموا حليب عادي لو معندكوش مشكلة)

نصف كوب عدس اصفر

ملح وفلفل حسب الرغبة

بابريكا (افضل المدخنة لأنها بتدي مذاق مميز)

ملعقة كبيرة معجون الكاري او بودرة الكاري ايهما متوفر

الطريقة:

بنشوح البصل والتوم و الكرفس فى شوية زيت او لو بتتبعوا نظام نباتي قليل الدهون نشوحهم فى حبة ماية صغيرين لحد ما يبقى لونهم شفاف

نضيف باقي الخضار و العدس ونشوحهم شوية

نضيف البهارات والكاري

نضيف الحليب ونترك كل ده على نار هادية لحد ما يغلي تقريبا 20-30 ساعة

نضربهم ضربة خفيفة بالخلاط اليدوي او ناخد شوية ونضربهم فى الخلاط العادي الهدف مش اننا نطحنهم تماما لكن عشان نخلي الشوربة كريمي

مع وجود بعد الخضار صحيح

ملحوظة: الوصفة دي من الوصفات اللى تنفع جدا فى حلة الطهي البطئ بتاخد تقريبا ثلاث ساعات على درجة متوسطة

للمزيد من التفاصيل ممكن تشوفي الفيديو ده