ازيكم يا ماميهاتي الحبيبات 🙂

موضوع السمنة فى رمضان من المواضيع اللى بتشغل بال الكتير ( سواء ماميهات او لأ) خصوصا ان رمضان موسم الكنافة والقطايف والذى منه

عشان كدة قلت اقولكم على كام نصيحة بعملهم كل رمضان و بفضل الله مش بتخن فى رمضان بل بخس كمان ومش بحرم نفسي من الحلويات متخافوش…ازاي بقة؟ هأقولكم اهوه…

1.خلى اكلك فى رمضان اكل طبيعي قدر المستطاع يعني ابعدي عن المواد الحافظة او الحاجات اللى بتجي فى عبوات لأن كل الكيمويات دي الجسم مس بيعرف يتعامل معاها وبيخزنها على شكل دهون

2.خلي فيه خضار او فاكهة فريش مع وجباتك مثلا سلطة مع الفطار و خضار مقطع مع السحور و فاكهة كسناك بينهم

3.حاولي تتجنبي الاكل الابيض قدر المستطاع يعنى الخيز الابيض , الدقيق الابيض, الرز الابيض الخ لأن اليافه قليلة ومش بيشبع

4.التمر مع اللوز يعتبر تحلية ممتازة بعد الفطار بيشبع حاجتك لتناول السكريات وبيمدك بالالياف وكمان يغنيكي عن السكر الابيض المستعمل فى الحلويات المعتادة

5.كتري من الحبوب الكاملة والاطعمة الغنية بالبوتاسيوم فى رمضان زي البقوليات وكمان الفواكه المجففة زي المشمش و القراصية لأنها بتشبع وبتساعد على مقاومة الامساك

6.استني بعد الفطار بساعة تقريبا و بعدين حلي و خلي دايما فيه فاكهة ومكسرات نية جاهزين قدامك عشان يبقى اسهل عليكي انك تحلي بيهم

7. للسحور حاولي يكون فيه كربوهيدرات معقدة زي القمح الكامل او الفول او الشوفام ( او كلهم سوا) بيشبعوا و بيدوكي طاقة خلال اليوم

8.احرصي على تناول الخضار والفاكهة مع السحور لأنهم حيمنعوا العطش خلال اليوم

9.الماية مهمة جدا عودي نفسك تشربي على الاقل لترين ماية كل يوم انا دايما بملى ازازة جنبي و افضل كل شوية اخد بق منها بين ركعات التراويح وبين ورد القرآن

10.

الرياضة قبل الفطار ضرورية لأنها بتحمي الجسم من فقدان العضلات وبالتالي استبدالها بالدهون بسبب الصيام لساعات طويلة طبعا احنا كستات مشغولين قبل و بعد الفطار بس اللى بعمله اني كل يوم قبل الفطار بعمل تمارين خفيفة لمدة خمس او عشر دقائق مش كتير ( احسن من مفيش) يعني مش لازم ياما رياضة 45 دقيقة يامفيش اي حاجة بتفيد على المدي البعيد

دي مش كل النصايح اللى عندي لسة فيه نصايح كمان ممكن تشوفيها فى الفيديو ده