ازيكم يا ماميهاتي الحبيبات

 انهاردة بشاركم فى وصفة من الثوابت فى بيتنا الحقيقة من كتر ما هى لذيذة وسهلة و كمان بسهولة كمان ممكن ننقلها معانا يعني تنفع الولاد ياخدوها المدرسة او ناخدها معانا فى كيس او علبة صغيرة لما نكون رايحين اي مشوار و تبقى ممتازة فى السفر لو فاكرين نصايح السفر مع الاولاد دي تبقة رائعة كسناك ليكي و ليهم

اوكي كفاية  رغي بقة و يلا نشوف المقادير

1/3 كوب زبدة فول سوداني او  زبدة اى مكسرات

1/2 كوب عسل نحل

1/3كوب سكر بني

ملعقة او ملعقتين كبيرتين من الزبدة او الزيت (انا باستخدم زيت جوز الهند)

ملعقة صغيرة فانيليا

4 اكواب كويكر

2 كوب كورن فليكس

شكولاتة غامقة للتقديم

ملحوظة ممكن نستعمل كورن فليكس بس او شوفان بس الكورنس فليكس المستعمل يفضل يكون سادة من غير سكر خالص يعنى الكورن فليكس البران يكون ممتاز هنا…ممكن كمان تضيفه باى كمية حاجات تانية زي جوز الهند انا شخصيا بحبه قوي فى الخلطة دي او فواكه مجففة او كنوا او ردة او اى حاجة من دول براحتكم خالص

 1. على نار هادية بنسخن الزبدة مع العسل و السكر وزيت جوز الهند مع التقليب لحد ما الخليط يتجانس و يطلع فقاقيع الموضوع بياخد 3 دقائق تقريبا فخلينا جنبه عشان ممكن بسرعة يتحرق

2. لما يسخن الخليط نطفي النار ونضيف الفانيليا و نقلبها كويس

3. فى طبق عميق نجهز خليط النواشف بتاعنا ونصب عليه السائل و نقلبهم كويس

4. نفرد كل ده فى صينصة و نكبسه فى بعض كويس و نحاول انه يكون مش سميك جدا عشان يسهل اكله على الولاد

5. بندخل التلاجة تلت ساعة او نسيبه برة ساعة لحد ما يمسك فى بعضه

6. نسيح الشكولاتة مع ملعقة صغيرة زيت او زيت جوز هند فى المايكرويف 30 ثانية فى 30 ثانية لحد ما توصل للقوام المطلوب الشكولاتة بتدي طعم غير ان الشكولاتة الغامقة ليها فوايد كتير طبعا وبتساعد على تماسك البارز فى بعض او حابين ممكن تقطعه البارز الاول و تغمسوا القاع فى الشكولاتة لو حابينها تطلع زي اللى بنشتريها من السوق و تتماسك اكتر

7. ترجع التلاجة بعد كدة لمدة نصف ساعة وبالهنا و الشفا

للمزيد من التفاصيل شوفي الفيديو ده 🙂