على الرغم من ان موقعي و قناتى و صفحتي وسلاطاتي و بابا غانوجي كلهم مركزين على الاولاد و التربية و الاكل الصحي وباعدة نفسي تماما عن موضوع العلاقات الزوجي الشائك المعقد ده الا انى مقدرتش امنع نفسي من مشاركتكم الكتاب الرائع ده

لغات الحب الخمسة

الكتاب بيقول ان كل واحد فينا بيحب يتحب بطريقة معينة و فى العادة بيعبر عن حبه بنفس الطريقة دي….فيه ناس اهم حاجة بالنسبة لهم الكلام الحلو مثلا بينما ناس تانية مهم قوي بالنسبالهم الحضن او لمسة الايد

من غير ما اطول عليكم اكتر من كدة هي دي لغات الحب الخمسة من غير ترتيب محدد

1 الحب عن طريق الكلام

ودي سهلة و ستات كتير بتحب الطريقة دي الكلام الحلو  ( حتي لو كدب عشان كدة بنات كتير بتتأثر بكلام الاغاني)

2  الحب عن طريق قضاء وقت خاص

ودي بيعملوها ازواج كتير لكن زوجاتهم مش بتفهم انه حب وهو انه يقضي وقت فى بيته جنب مراته حتى لو مش بيكلمها لكن وجودها جنبه مهم و

بيديه احساس بالراحة والاطمئنان ومتخيل انها فاهمة كدة و حاسة ان ده حب….لكن مش دايما ده بيحصل

3 الحب عن طريق الهدايا

فيه ستات و رجالة كتير بيحبوا الطريقة دي ….جبتلك هدية يبقي خلاص مش مطلوب مني حاجة تاني والنوع اللى بيتكلم اللغة دي بيعتبر انه قمة الحب انك جيتي على بالي وانا برة البيت مثلا فافتكرتك و جبتلك الحاجة اللى بتحبيها ايه مطلوب تاني؟

4. الحب عن طريق الخدمات

وهي طريقة عملية يعني التعبير عن الحب باسلوب يمكن قياسه و حسابه وهى الطريقة المفضله عند اغلب ان لم يكن كل الرجالة…المفروض انه طالما لسة مطلقيش و لسة بيصرف على البيت و لسة بيجيب معاه طلابات و هو مروح يبقي كدة دليل عملي و فعال على الحب

5 الطريقة الأخيرة هى الحب عن طريق اللمس

ودول الأشخاص اللي بيحبوا يحضنوا حبايبهم كتير

على الارجح ان كل واحد فينا بيحب يتحب بالطرق دي كلها لكن فيه طريقة بتكون هى الأهم او الأكبر او هى الطريقة اللى احنا بنعبر بيها عن حبنا للى بنحبه وبالتالي لما هو /هي مش بيعبرلنا بنفس الاسلوب بنحس انه مش بيحبنا كفاية لأنه مش بيتكلم نفس اللغة اتمنى انه تعريف او تحديد اللغات بالشكل ده يساعدك انك تقدري تفهمي حب زوجك ليكي و توضحيله كمان انت بتحبي تتحبي ازاى بشكل ممكن يطبق

الحقيقة انا شايفة ان الراجل كان دقيق جدا فى تسميتهم ” لغات” لأن فعلا الواحد اما يكون متعود على طريقة معينة و يضطر يتعلم طريقة جديدة حتبقي زى اللغة الجديدة فعلا وحتحتاج وقت على ما الواحد يتعود عليها ( ربنا يعينا جميعا)

انتوا بقة ايه رأيكم فى الكلام ده؟ وشايفين انه ينفع يطبق ولا ايه؟ حابة اسمع منكم…

للمزيد من التفاصيل ممكن تشوفي الفيديو ده 🙂