ازيكم يا ماميهاتي الحبيبات

انهاردة بقدملكم وصفة لكوكيز خالية من منتجات الالبان و خالية من البيض وكمان خالية من الجلوتين ( البروتين اللى بيكون موجود فى القمح و الدقيق) يعنى مناسبة للدايت و كمان مناسبة لأغلب انواع الحساسية ولأنها غنية بالبروتين فهي ممتازة كمصدر طبيعي للطاقة وكمان سهل قوي اننا ننقلها معانا يعني ممكن نحطها للولاد فى ال lunch box او ناخدها معانا واحنا بنجري خلال اليوم…

كفاية رغي بقة و ندخل فى المقادير على طول

المقادير:

2 حبة موز (يفضل يكون مستوي عشان يحلي الطعم)

1 كوب زبدة اللوز ( استعملت زبدة لوز لأني لسة عملاها لكن ممكن نستعمل عى نوع زبدة مكسرات مثلا زبدة الفول السوداني تبقى ممتازة هنا)

1/4 كوب سكر ( ممكن نستعمل سكر رجيم الفكرة منه ان طعم زبدة المكسرات بيكون قوي جدا الموز لوحده مش بيسكرها كفاية لكن لو بتحبوا طعم زبدة المكسرات و مش بيدايكم ممكن تشيلوا السكر خالص)

1/4 كوب بودرة كاكاو خام (ممكن كاكاو نسكويك ونستغنى او نقلل من السكر )

1 ملعقة صغيرة بيكينج باودر

1ملعقة صغيرة فانيلا

رشة ملح

1/4 كوب شكوكليت شيبس بيضة (ممكن شكولاتة مطبخ بيضا مقطعة )

الطريقة:

*بنسخن الفرن على درجة 175

*فى طبق عميق بنهرس الموز

*ثم بنضيف باقي المكونات و نخلطها جيدا ….مش محتاجين خلاط فى الوصفة دي

*انا بحب اضيف جزء من الشكولاتة فى الخلط والجزء الباقي اوزعه على الجه لكن ده حاجة اختيارية

*بندخلها الفرن لمدة من 10 – 12 دقيقة

*ملحوظة مهمة جدا لازم اما تطلع نسيبها فى الصاج لحد ما تبرد تماما (على الاقل خمس دقائق)

المقدار ده بيطلع حوالى 20 حبة وممكن تفضل فى التلاجة لمدة اسبوعين

عشان تشوفي الطريقة بالتفصيل ممكن تدخلي على الفيديو ده