زبدة اللوز او  المكسرات عموما من الحاجات المفيدة جدا و مصدر مهم للبروتين النباتي و الدهون المفيدة بس لأن اللى بتتباع فى السوق بتكون يا اما مليانا زيوت مشبعة و سكر ومواد حافظة و كيماويات يا اما غالية جدا  لو من ماركة نضيفة او من شركة بتدعي انها طبيعية قررت اني اعملها فى البيت احسن حتى عشان نبقى عارفين فيها ايه و خصوصا انها سهلة جدا

المقادير

2كوب لوز نى مقشور (او اى مكسرات)

رشة ملح

زيت جوز هند (او اى زيت نباتي)

الطريقة:

انا مستعملة هنا كوبايتين لأنهم هيقلوا و هيصفوا على كوباية فى الاخر فنعمل حسابنا ان الكمية اللى احنا محتاجينها نبدأ بضعفها

هنبتدي بأننا نحمص اللوز شزية فى الفرن على درجة منخفضة كام دقيقة ( عينينا عليه عشان بيتحرق بسرعة)

واول ما يبقى لونه دهبي نطلعه…يعني مش حيكون اتحمص تماما بيكون لسة ني شوية…..ملحوظة انا استخدمت لوز مقشر عشان القشر ممكن يدي مرار فى الاخر فى مكسرات معينة زي البندق مثلا فلو معندكوش المكسرات مقشرة من الاول ممكن بعد التحميص نفركها بفوطة مطبخ ناشفة عشان تتقشر

والمكسرات لسة دافية حنحطها فى محضرة الطعام مع رشة الملح وملعقة صغيرة من الزيت ونضربها….الضرب بياخد وقت…تقريبا من تلت لنص ساعة و كذا مرة هنوقف الماكينة و ننزل المتجمع على الاطراف ونكمل لحد ما نوصل للقوام اللى احنا عاوزينه

بتتشال فى التلاجة وممكن تقعد اسبوعين بالكتير ….

ممكن تشوفي الوصفة بالتفصيل في الفيديو ده