بيتزا مجمدة فى الفرن

مقادير تكفى لتحضير 4 بيتزات وسط

ازيكم يا ماميهاتى الحبيبات انهاردة جايبلكم وصفة تتحدى واحدة من اكبر تحديات الست فى البيت و هى البيتزا

اخيرا وصفة بيتزا مش بتنفش فى الفرن زى الكيك وتطلع تخينة قوى (عندى عقدة من الموضوع ده)

اللطيف انها بتتجمد وبالتالى مريحة فى الويك اند بدل الطبيخ او الدليفيرى ( مش عارفة ليه باجى على الويك اند و اخلص ومبقاش طايقة اطبخ اى جاجة)

المهم ادى المقادير وجربوها على ضمانتى

للعجينة نفسها محتاجين:

1/2 3 كوب دقيق (عادي مش دقيق بيتزا)

2 ملعقة صغيرة ملح

2 ملعقة كبيرة زيت زيتون

للخميرة محتاجين:

كيس خميرة فورية صغير ( او ما يعادله من الخميرة العادية)

1/3 1 كوب ماء دافىء

1 ملعقة كبيرة سكر

لصوص البيتزا:

3/4 كوب طماطم مهروسة ( انا مستخدمة طماطم مجمدة- تقريبا استخدمت طماطمتين وسط)

1 ملعقة صغيرة بهارات ايطالية ( واذا مش متوفرة المخلوطة جاهزة ممكن استعمال زعتر ناشف وريحان ناشف وممكن نستخدم فريش منهم برضه)

1 ملعقة صغيرة بودرة ثوم ( وممكن نستخدم ثوم طازج)

1ملعقة صغيرة بودرة بصل

او اذا فيه خلطة بهارات انت بتحبيها للبيتزا استعملى اللى بتحبيه حسب الرغبة

ولو لأى سبب مش حابة صوص طماطم بالمرة ممكن تدهنى العجينة بوية زيت زيتون وثوم مهروس

الطريقة:

 * اول خطوة هى تحضير الخميرة وده بأنك حتاخدي شوية من السكر و الماية وتدوبيى فى المايه الخميرة و السكر وتغطيهم و تسيبيهم فى مكان دافى…الخطوة دى ممكن تعمليها من الصبح يوم ما ناوية تحضري البيتزا او ممكن كمان من بليل ولو مفي وقت نص ساعة بالكتير حتكون جاهزة

* بعد كدة فى العجانة بس تتأكدى انك مركبة راس العجن نضيف كل المكونات الجافة مع الخميرة و نعجنها لمدة 4-5 دقائق على سرعة متوسطة ( مش اقل من كدة تتعجن لحد اما تلم على بعضها و تنعم العجينة) لأنها بتحتاج لتّ شوية العجينة دى

* نخرج العجينة و المقادير دى بتعمل 4 بيتزات وسط او اتنين كبار او 8 ميني ونقسمها لكور حسب احنا مخططين نعملها ايه من دول

* فى صينية او طبق كبير ندهنه زيت نحط الكور دى و ندهن وها زيت هى كمان عشان متنشافش ونغطيها بكلينج فيلم و فوقيه فوطة مطبخ ونسيبها فى مكان دافى ساعة ( انا بحب احطها فى الفرن المطفى فى الوقت ده) لحد ما تخمروحجمها يتضاعف

* بعد كدة نشغل الفرن على درجة 200 و نحط جواه صاج مقلوب

* ونشكل البيتزا بالتخن اللى عاوزينه و ندخلها لمدة 5 دقائق بالظبط

مش عاوزينها تستوى تماما بس نص سوا

* بعد ما تخرج من الفرن نضيف الصوص و شوية جبنة او ندهنا بالزيت و التوم (اللى بالزيت و التوم دى ممتازة لو بدل صوص الطماطم بتحبوا صوص البيستو او الباربكيو)

* بنحطها فى اكياس فريزر محكمة الغلق و نشيلها فى الفريزر لمدة 6 شهور تقريبا

* لما نحب نسويها نطلعها و نضيف اى اضافات بنحبها ( خضار لحوم اى حاجة) ونسويها على الصاج المقلوب برضه لحد ما الجبنة تسيح والحواف تتلون حبة يعنى حوالى 10 دقايق

ملحوظة: انا مضفتش اى خضار من دلوقتى عشان الماية اللى فيه متبوظ العجينة ممكن تضيفوا من دلوقتى لحوم لو حبين او لو ولادكم زى ولادي حايحبوا يكلوها كدة من غير اضافات تانية

للمزيد من التفاصيل شوفوا الوصفة فى الفيديو ده