كل سنة و كلكم طيبين يا ماميهاتى الحبيبات و اتمنى يكون العيد عيد سعيد عليكم و على كل حبايبكم ان شاء الله…

السنة دى قلت اقلكم على كام فكرة نحتفل فيهم بالعيد مع اولادنا بشكل جديد و تعليمى فى الوقت نفسه عشان نخلى ولادنا يستنوا العيد و يفرحوا بيه

الفكرة الأولى هى زينة العيد نفسها و انا السنة دى عملت شريط علقت فيه شراشيب و حروف “عيد سعيد” ملونة بحيث تزينوا الكلمة مع اولادكم بالطريقة اللى يحبوها

الفكرة التانية هى كب كيك على شكل خروف

ودى لذيذة قوى خصوصا ان الاولاد بيحبوا الكيك و بيحبوا يساعدوا فى عمايل الكيك كمان

وصفة الكيك اللى انا مستعملاها هنا هى كيك الفانيلا ( كيك بيتى كروكر الجاهز) بس بدل الماية بحط حليب و بدل الزيت بحط زبدة بطلع كيكة هشة و لذيذة ودى وصفتى المفضلة اللى بلجاء لها فى اى مناسبة الحقيقة …على الآرجح اغلبكم بيحب يعمل الكيك بطريقته الخاصة فكل واحد يعمل اللى بيحبوا المهم نزينها بالمارميشلو اللى بيدى شكل الفروة و كمان رسمت بالشكولاتة السايحة وش خروف انا بسيح قالب شكولاتة كادبورى فى المايكرويف و بشتغل بيه

الفكرة التالتة

بدل الكاب كيك ممكن نعمل بسكوت على شكل خروف ( مع ان عيد الأضحى مش عيد بسكوت بس معلش) وصفة البسكوت اللى انا مستعملاها هى وصفة الشيف المفضلة عندى ديما حجاوى

مقاديرها:

1 و 3/4  كوب دقيق

1 ملعقة صغيرة بيكنج باودر

1 و 1/4 اصبع زبدة

3/4 كوب سكر

رشة ملح خفيفة

1 بيضة

1 م ص فانيليا

2 ملعقة كبيرة حليب

1/2 كوب سكر بودرة

وانا كمان اخدت جزء صغير ضفتلوا كاكاو عشان يبقى وش و رجلين الخروف و شكلت البسكوت بقطاعة البسكوت اللى على شكر وردة

الفكرة الرابعة و الأخيرة هى مجسم بيبين مراسم الحج

عشان الطفل يتعلم الحج بيحصل فيه ايه بالظبط

وممكن كمان تقروا سوا قصة عن الحج او تتفرجوا على الفيديو ده

هى دى كل الأفكار بس حابة اعرف انتم احتفلتوا بالعيد ازاى مع اسرتكم؟

للمزيد من التفاصيل ممكن تشوفوا الكلام ده فى الفيديو ده