ازيكم يا حلوين؟

من فترة طويلة حبتين كنت جبتلكو الوصفة دى بس عدلت فيها حاجات كتير لحد ماوصلت لأحلى توليفة من وجهة نظرى

المقادير هى

1.5 كوب جوز هند

10 تمرات منقوعة فى الماية لمدة 15 دقيقة على الأقل او ما يساوى الكمية دى من العجوة

0.25 كوب كاكاو خام

رشة ملح

فانيلا او قرفة او هيل (حبهان) او اى بهرات بتحبيها

مكسرات او كاكاو او سمسم لتغطية الكور من الخارج

الطريقة:

1. فى محضرة الطعام نضرب جوز الهند لحد مايبقى زى الدقيق تقريبا (مش لازم يتضرب كتير قوى يعنى دقيق خشن مثلا)

2. بعد كدة بنضيف التمر و الكاكاو ورشة الملح و البهارات و نضرب كل ده مع بعض

3. نكور الخليط و نلفه فى الغطا الخارجى اللىّ حابينوا سواء مكسرات او سمسم او كاكاو ( اخترعى براحتك)

4. نحطها فى التلاجة لمدة نص ساعة تمسك حبة قبل التقديم…

ممكن تحتفظى بيها فى التلاجة لشهر تقريبا (مجربتش اطول من كدة) وممكن كمان برة رمضان تبقى سناك لذيذة ممكن تاخديها معاكى فى علبة بلاستيك او كيس تلاجة و انت خارجة فى مشوار او رايحة الشغل

جربيها وابعتيلى صور انتاجك على الانسجرام واعمليلى تاج او على الفايس بوك على الصفحة عشان انشرهالك

و متنسيش تتفرجى هنا على الطريقة كاملة

 استمتعى بأسرتك الجميلة 🙂