الأمومة فى الراس مش فى الكراس!

طبعا مش مفاجأة صادمة إن القراءة مش الإهتمام رقم واحد للفرد العربى, ولا الأخير وحياتكم… عشان كدة برضه مش مفاجأة إن أكيد الأمهات الجدد فى البلاد العربية مش بيفكروا و هما بيشتروا حاجات البيبى إنهم يشتروا أحدث كتاب نزل السوق عن التربية ولا ناويين يشتركوا فى موقع من المواقع التربوية على النت عشان يحصلوا على نصائح من الخبراء…

والسبب فى الموضوع ده حسب ما شفت من ردة فعل الأمهات الى أسعدنى الحظ بالكلام معاهم يرجع لسببين, الأول عدم الثقة فى كلام الكتب و المواقع لأنه الى كاتبنها كائنات فضائية طبعا من كواكب تانية و مقابلوش عيالنا فعشان كدة مش ممكن نطبق الى بيقولوه على حياتنا….و السبب التانى إنه ربنا يخلى ماما و تيتا و حماتى و إخواتى و صحباتى و خبراتهم فى الحياة الى تكفى مليون كتاب أجيب كتاب ليه و هما حوالية؟؟؟؟
ماشى و ماله, كل واحد حر و مقدؤش غير إنى أحترم الرأى الأخر…رأى أخر؟؟؟ يعنى أنا ليا رأى مخالف للكلام ده…تصوروا أه!!!!
(شهقة دراميه مصحوبة بموسيقى كلاسيكية تدل على صدمة عنيفة جدا!)
إيه الرأى الأخر ده بقة إن شاء الله؟؟؟؟؟
أقولكم… الرأى الأخر إنى من أشد أنصار و مؤيدى الكتب و المواقع التربوية و بحلف بحياة الى كتبوها لأنها بإختصار غيرت حياتى كلها لما إكتشفتها, و حولتنى من أم مجهدة بصرخ فى إبنى طول النهار لست عاقلة و مش بتزعق على طول…
أول ما إكتشفت التأثير الرهيب للمواقع رحت ذى العبيطة أحكى بسعادة للأمهات الى أعرفهم عن مصباح علاء الدين ده, و ظنى (بعبط) إنهم حيفرحوا ذي ويسعدوا بالعلاج الفعال لمشاكل حياتهم الى منغصة عيشيتهم….صح؟… لأ غلط!
الصاعقة إنى فوجئت بردود أفعال تتراوح بين إنى أكيد بشتم الى قدامى الى إنى أكيد مجنونة و من مصلحة إبنى إنه يتربى مع ناس طبيعين!!!
إستغربت بشدة و مازلت مستغربة… وقعدت أراجع نفسى كتير وأتسأل إذا كنت أنا مثلا طريقتى هى المستفزة فى نقل المعلومة مثلا ولا إيه بالظبط؟؟؟ أنا لم أدعى إنى أنا الى اخترعت المعلومات دى عشان يتفهم غلط إنه المقصود من كلامى “التنطيط” على خلق الله, ولا قصدت بأى شكل إنى أوصل رسالة إنى أحسن منك يا فلانة أو يا علانة…إحنا فى الأخر كلنا فى الهوا سوا كلنا أمهات و كلنا بنعانى والى يعرف حاجة تساعدنا على الاستمرار مايقولها…صح؟…مش عارفة يظهر إنه غلط برضه…
نفسى أقول إنى مش هاممنى رأى الناس و أنى مش زعلانة من ردود الفعل الى كلها هجوم و تجريح و استهزاء بعبطى المفرط… لكن غصب عنى برجع بيتى بعد أى لقاء من دول  زعلانة و محبطة و يفضل الكلام يرن فى ودنى…
 ياترى الى بيحصل ده بيحصل ليه؟ وإذاى الواحدة تقدر تستمر فى اتجاه ضد التيار؟
 
Advertisements

2 comments

  1. معلش هوي هيك ردة فعل الناس دايما 🙂 انا حتى زوجي بيتدايق لما احكيلو انو قرأت ولقيت بينصحو بطريقة غير عن اللي بيعملها.. بيضل يحكيلي يعني انتي اللي بتفهمي بس وغيرك لأ؟؟ يعني اللي كاتبينو هوي الصح بس وغيرو لأ.. والخ من هاد الكلام.. المهم انو في الاخر انتي هيك مرتاحة اكتر.. وانا كمان.. وازيدك كمان صرت لما بنتي تدايقني وازعل واطبق اشي من اللي قرأتو عن جد افرح.. ولما اكون عارفة شو دلالات سلوك معين بحس اني عم بدرسها وهيي بتحكي او وهيي بتصرخ.. انو انا عم بفهمها اكتر
    ودايما خلي في بالك انو العصبية هي علامة ضعف وقلة فهم.. يعني انتي كل ما كنتي مو فاهمة ابنك اكتر.. راح تعصبي عليه اكتر.. وكل ما حسيتي انو الامور بتخرج عن سيطرتك ومو عارفة ترجعيها لمسارها الصحيح.. كمان راح تعصبي اكتر..
    في جروب عالفيس بوك اسمو
    better moms
    وكتير مفيد.. ازا بتحبي تابعي
    ودمتي بخير 🙂

  2. اولا مرسى قوى قوى قوى على انك أخدتى من وقتك الضيق بالطبع يا ليلي عشان تعملى تعليق على كلامى بجد شكرا 🙂
    ثانيا, جميل إنه الاقى حد بيمر بنفس الى بمر بيه و فعلا معاكى حق فى كل الى بتقوليه أنا بحس بنفس الشىء و بتبسط قوى إنى بلاقى طرق للتصرف مع ابنى غير إنى اقوم أضربه أو أصرخ فيه ذى ما بشوف أمهات كتير بتعمل و بتكون النتيجة إنه الطفل بيكون عنيف و بيصرخ دايما هو كمان مش بيكون متربى أحسن و مؤدب أكثر ذى ما الناس بتفتكر,,,, و معاكى حق فعلا أحنا نعتبر فصيلة نادرة من الأمهات المهتمة بالأمومة و بتحاول تجيدها على أكمل وجه بتعزيز الخبرة بالعلم لكن إحنا الصح أكييييييييييييييد
    إن شاء حتابع الجروب و أنا كمان عندى صفحة على الفايس بوك أسمها smart mommys
    بكرر شكرى و فى انتظار المزيد من تعليقاتك الجميلة قوى 🙂 🙂 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s